درس القرآن و تفسير الوجه الأخير من هود .
::::::::::::::::::::::::::::::::::::::::::::::::::::::::::
أسماء إبراهيم :
شرح لنا سيدي و حبيبي يوسف بن المسيح ﷺ أثناء جلسة التلاوة المباركة من أحكام التلاوة ؛ أحكام النون الساكنة و التنوين , ثم قام بقراءة الوجه الأخير من أوجه سورة هود و هو الوجه الرابع عشر ، و أجاب على أسئلتنا بهذا الوجه ، ثم صحح لنا تلاوتنا ، و أنهى الجلسة بأن طلب نبي الله الحبيب منا إستخراج الأحكام من الوجه .
بدأ نبي الله جلسة التلاوة المباركة بقوله :
الحمد لله ، الحمد لله وحده ، الحمد لله وحده و الصلاة و السلام على محمد و من تبعه من أنبياء عهده و بعد ، لدينا اليوم الوجه الرابع عشر و الأخير من هود ، و نبدأ بأحكام التلاوة و مروان :
مد فرعي بسبب السكون :
مد عارض للسكون و يكون غالباً في نهايات الآيات و يمد بمقدار ٤ إلى ٥ حركات .
و مد لازم حرفي أو كلمي : الحرفي هو في أوائل السور , و الكلمي مثقل و يُمد بمقدار ٧ حركات مثل (و لا الضآلين) .
و المد الحرفي له ثلاثة أنواع : حرف واحد يمد حركة واحدة و هو الألف في حروف المقطعات في بداية السور ، مجموعة من الحروف تمد بمقدار حركتين و هي مجموعة في جملة (حي طهر) , و حرف تمد بمقدار ٦ حركات و هي مجموعة في جملة (نقص عسلكم) .
و بعد مروان قال الأحكام رفيدة و ثم أرسلان .
__
و ثم تابع نبي الله يوسف الثاني ﷺ الجلسة بشرح الوجه لنا فقال :
إحنا كنا قلنا المرة اللي فاتت هنسأل السؤال ده ، ما الفرق بين (عطاء غير مجذوذ) و (نصيب غير منقوص) ، حد يعرف؟ ، ما هو حازم إمبارح إستفزني و جاوبته ، مع إني كنتُ ناوي إن إحنا نجاوب في الجلسة ، بس جزاه الله خيراً ، جاوبته في المدونة ، حد يعرف؟؟ طيب ، و أنا زودت الإجابة دي بالليل يعني أعتقد إن إنتو مقرأتوهاش ، (عطاء غير مجذوذ) و (نصيبهم غير منقوص) : (غير منقوص) يعني إيه؟ يكتمل ، سيكتمل و لكن ليس إلى الأبد ، و عرفنا إن كلمة نصيب كلمة مذمومة في القرآن ، نصيب من نصب ، فعيل ، نصيب أي إيه؟ من نصب أي تعب و وجل و ألم ، فلذلك الأفضل منقولش نصيب ، الأفضل نقول إيه؟ عطاء ، يعني عطاءك ، يعني منقولش هذا نصيبك ، لا هذا عطاءك ، منقولش نصيبك إذاً ، الأفضل يعني نقول إيه ، عطاءك ، تمام؟؟ و هنا ربنا سبحانه و تعالى بيتكلم عن العذاب لمين؟ للكافرين في الدنيا قبل الآخرة و هو نصيب ، من نصب و إصابة ، و إصابة موجهة لا تُخطئ من الله عز و جل لهم و عليهم ، (غير منقوص) أي سيكتمل ، لا ينقص ، و بالتالي ليس إلى ما لا نهاية ، ربنا هنا تكلم عن عطاء الجنة بشكل عام ، فقال (عطاء غير مجذوذ) ، مش إحنا عرفنا إن إحنا بنفسر القرآن بالقرآن ، كلمة (مجذوذ) ذكرت في صيغة أخرى في القرآن في آية (فجعلهم جذاذاً إلا كبيراً لهم لعلهم إليه يرجعون) إبراهيم -عليه السلام- كسر الأصنام ، فربنا قال على تفتيت الأحجار دي أو الأصنام دي إلى أجزاء : جذاذ ، فغير مجذوذ أي غير مُقطع أو غير مُفتت أو غير مُجزء ، ربنا بيقول عن الجنة بشكل عام (عطاء غير مجذوذ) يعني عطاء كامل ، عطاء مرة واحدة و كامل ، و لكن الإفادة هنا بتقول أن (عطاء غير مجذوذ) يعني مرة واحدة كاملة و تنتهي ، طيب هنستشف منين الأبدية غير المنتهية من كلمة إيه أو جملة إيه؟؟ (إلا ما شاء ربك) ، يعني (أما الذين سعدوا ففي الجنة خالدين فيها ما دامت السماوات و الأرض) يعني طالما السماوات و الأرض الأنية دي موجودة ، ربنا لم يُفنيها و لم يُقرر أن يُفنيها ، الجنة دي موجودة ، عطاءً غير مجذوذ ، طيب يُستثنى مين اللي يعبر إلى الجنان الأخرى ، مين؟؟؟ (إلا ما شاء ربك) إذاً (إلا ما شاء ربك) في مناط الجنة هو إيه؟ دلالة الإنتقال عبر الجنان في ما لا نهاية ، طيب ، (خالدين فيها ما دامت السماوات و الأرض إلا ما شاء ربك) إيه في مناط النار؟؟ يعني النار دي موجودة ما دامت السماوات و الأرض دي موجودة إلا ما شاء ربك من إيه؟ من وقت ، لها قدر محدد في هذا الكون ، ما دامت سماواته و أرضه كائنة ، إذاً (إلا ما شاء ربك) في مناط النار معناها إيه؟ جزء من هذه الدنيا أو من هذا الكون ، طيب (إلا ما شاء ربك) في مناط الجنة ، معناه إيه؟؟ أي أنه يدوم بعد فناء هذه السماوات و الأرض ، فهمتوني ، طيب .
{فَاسْتَقِمْ كَمَا أُمِرْتَ وَمَن تَابَ مَعَكَ وَلاَ تَطْغَوْا إِنَّهُ بِمَا تَعْمَلُونَ بَصِيرٌ} :
ربنا سبحانه و تعالى في الوجه الأخير في هود ، ينصح و يأمر و يعظ النبي و كل نبي ، يقول له (فاستقم) إستقيم ، فاستقم أمر مجزوم مؤكد ، (فاستقم كما أُمرت) زي ما أوحيت لك و أوحيت لمن قبلك : استقم على الصراط المستقيم و من تاب معك ، و اللي تابوا معك على الطريقة دي و بقوا مؤمنين ، يستقيموا برضو ، (و لا تطغوا) ، طيب الدلالة هنا إيه (فاستقم كما أمرت و من تاب معك) يبقى النبي هنا تاب ، يبقى النبي إيه؟؟ يتوب بإستمرار ، و المؤمنين يتوبون ، (فاستقم كما أمرت و من تاب معك) تاب معك أي إيه؟ انضموا إليك في التوبة ، و إيه تاني؟ (و لا تطغوا) يعني إيه؟ و لا تظلموا ، لأن الطغيان هو الظلم الشديد ، (و لا تطغوا) ليه ربنا بيقول لهم كده؟ بيهيء و بيمهد للسياق اللي جاي في الوجه الأخير ده ، هنعرفه دلوقتي ، (و لا تطغوا) أي من الطغيان ، لا تطغوا ، (إنه بما تعملون بصير) ربنا عليم بكل ما تعملون ، (إنه بما تعملون بصير) يعني هنا بيحفز فينا إيه؟ صفة الإحسان ، أن تعبد الله كأنك تراه ، فإن لم تكن تراه فإنه يراك ، و هي المراقبة في الله .
___
{وَلاَ تَرْكَنُواْ إِلَى الَّذِينَ ظَلَمُواْ فَتَمَسَّكُمُ النَّارُ وَمَا لَكُم مِّن دُونِ اللَّهِ مِنْ أَوْلِيَاء ثُمَّ لاَ تُنصَرُونَ} :
خلي بالك بقى ، هو قال لهم إيه ، النصايح دي ربنا سبحانه و تعالى للمؤمنين و للأنبياء عشان يبدؤا بأنفسهم ، و بعد كده يحققوا الموعظة اللي جاية دي (و لا تركنوا إلى الذين ظلموا أنفسهم فتمسكم النار) ، آآه إوعى في حياتك تُداهن أو تنافق أو تساعد ظالم و لو كان حاكماً و لو كان متمكناً ، إياك ، إن لم تسكت او تصمت فلا تُعنه على ظلمه ، ربنا سبحانه و تعالى بيقول إيه (و لا تركنوا إلى الذين ظلموا) لم يقل الله : و لا تظلموا معهم ، لا ، متركنوش بس لهم ، يعني متستريحوش لظلمهم ، (و لا تركنوا إلى الذين ظلموا أنفسهم فتمسكم النار) (فتمسكم النار) الفاء هنا للسرعة ، يعني النار تُحيط بكم لو إنتو بس استريحتم و رضيتم بظلم الظالمين ، (و ما لكم من دون الله من أولياء ثم لا تنصرون) ربنا هيتخلى عنكم ، لن يكون وليكم بعد اليوم ، بعد أن تساعدوا الظالمين في ظلمهم أو تركنوا إلى ظلمهم يعني تتقبلوه و ترضوه ، عياذاً بالله ، (ثم لا تنصرون) ربنا مينصركمش أبداً لأن الجزاء من جنس العمل .
___
{وَأَقِمِ الصَّلاةَ طَرَفَيِ النَّهَارِ وَزُلَفًا مِّنَ اللَّيْلِ إِنَّ الْحَسَنَاتِ يُذْهِبْنَ السَّيِّئَاتِ ذَلِكَ ذِكْرَى لِلذَّاكِرِينَ} :
و بعدين؟ (و أقم الصلاة) ، (و أقم الصلاة طرفي النهار و زلفاً من الليل إن الحسنات يذهبن السيئات ذلك ذكرى للذاكرين) ربنا هنا بيوطد و بيرسخ لمبدأ الأمر بالمعروف و النهي عن المنكر ، اللي هو سبب خَيرِيّة هذه الأمة ، أمة الإسلام ، الأمر بالمعروف و النهي عن المنكر ، بداهةً كده ، أمة خَيريتها في الأمر بالمعروف و النهي عن المنكر ، هينفع تركن للذين ظلموا؟؟؟؟ هينفع تركن للظالمين؟؟ و لا تسير على مبدأ : كلمة حق عند سلطان جائر ، هذا هو المبدأ الصحيح و هذا هو خير الجهاد ، فلذلك قال الله (و أقم الصلاة) أقم الصِلة ، (و أقم الصلاة طرفي النهار و زلفاً من الليل) (طرفي النهار) اللي هي صلاة الصبح و صلاة المغرب ، (و زلفاً من الليل) اللي هي إيه؟ قيام الليل ، يعني ربنا بيأكد على صلاة الصبح و صلاة المغرب و قيام الليل ، ليه؟ لأن قبل الصلوات الخمس ، إيه الصلوات المفروضة؟؟ صلاة الصبح و صلاة المغرب بس ، و كانت ركعتين ركعتين ، المغرب كان ركعتين ، و قيام الليل كان نفل ، كان يعني إيه؟ من باب التقرب و التحنث إلى الله عز و جل ، و بعد كده في المعراج فرض الله سبحانه و تعالى الخمس صلوات بكيفيتها الحالية ، إذاً (و أقم الصلاة طرفي النهار و زلفاً من الليل) الآية دي نزلت قبل حادثة المعراج ، و سورة هود بشكل عام هي سورة مكية ، عارفين طبعاً السورة ما بتنزلش مرة واحدة ، هي آيات و بعد كده ربنا بيرتبها ، تمام؟ بواسطة جبريل -عليه السلام- ، إن الحسنات يذهبن السيئات) مبدأ إيه بقى؟ إنك لو عملت سيئة ، إعمل حسنة ربنا يُذهب السيئة دي و يُضاعفلك الحسنات ، (ذلك ذكرى للذاكرين) ده تذكير لك و لغيرك .
__
{وَاصْبِرْ فَإِنَّ اللَّهَ لاَ يُضِيعُ أَجْرَ الْمُحْسِنِينَ} :
(و اصبر) أمر للنبي و كل نبي و لأتباع النبي ، (و اصبر) الصبر : صلة البِر ، الصاد أي صلة ، بِر ، صلة البر ، (و اصبر فإن الله لا يضيع أجر المحسنين) المحسن أجره مبيضعش ، المحسن خالد مُخلد أبد الأبدين إلى ما لا نهاية في الجنان المتعاقبة .
___
{فَلَوْلاَ كَانَ مِنَ الْقُرُونِ مِن قَبْلِكُمْ أُوْلُواْ بَقِيَّةٍ يَنْهَوْنَ عَنِ الْفَسَادِ فِي الأَرْضِ إِلاَّ قَلِيلاً مِّمَّنْ أَنجَيْنَا مِنْهُمْ وَاتَّبَعَ الَّذِينَ ظَلَمُواْ مَا أُتْرِفُواْ فِيهِ وَكَانُواْ مُجْرِمِينَ} :
(فلولا كان من القرون من قبلكم) ربنا هنا بيأكد تاني و بِيفَصل مسألة الأمر بالمعروف و النهي عن المنكر ، مهمة جداً و هي صمام الآمان للمجتمعات ، صمام الآمان للمجتمعات إيه؟ الأمر بالمعروف و النهي عن المنكر ، اللي هي المفروض دلوقتي بقت بشكل عملي في المجتمعات الحديثة ، هي عبارة عن إيه؟ الجهات الرقابية ، يعني زي مجلس الشعب ، الرقابة الإدارية ، الجهاز المركزي للمحاسبات ، الإعلام ، كل دي وسائل أمر بالمعروف و نهي عن المنكر ، و بالتالي لا يمكن لأي ظالم أن يظلم ، و لا يمكن لأي حاكم أن يحكم بالظلم ، إنما تكون هذه مؤسسة تُجبره على ترك الظلم ، حتى و إن راودته نفسه إلى الظلم ، لا يستطيع لأن هناك مؤسسات تُجبره على عدم الظلم ، اللي هي إيه؟ المؤسسة القضائية ، مؤسسة مجلس الشعب ، المؤسسة الرقابية كالرقابة الإدارية و الجهاز المركزي للمحاسبات و الإعلام الحُر ، الصحافة الحُرة ، كل ده يؤدي في النهاية إلى إيه؟؟ إلى عدم الظلم ، كذلك الفصل بين السلطات دي ، كل سلطة منفصلة عن السلطة الأخرى ، الفصل بين السلطات أيضاً إيه؟ يؤدي و يُكرس إلى عدم الظلم ، الي هو مبدأ الأمر بالمعروف و النهي عن المنكر ، اللي هو صمام الآمان للمجتمعات ، اللي هو سبب خيرية المسلمين ، اللي المسلمين تخلوا عنه ، على تمام عصورهم إلا في عهد الخلفاء الراشدين : أبو بكر و عمر و عثمان و علي و عمر بن عبد العزيز ، نوادر كان في عدل في السياسة أو في حكم المسلمين ، للأسف الشديد ، فلذلك الله سبحانه و تعالى أمرنا بالمعروف و نهانا عن المنكر ، و أمرنا أن نأمر بالمعروف و ننهى عن المنكر ، (فلولا كان من القرون من قبلكم) (القرون) أي الأمم ، (أولوا بقية ينهون عن الفساد) مجموعة تنهى عن الفساد ، ربنا بيقول إيه (فلولا كان من القرون من قبلكم) لو كان يعني ، (ينهون عن الفساد في الأرض إلا قليلاً ممن أنجينا منهم) يعني ربنا بيقول لهم إيه؟ كنتُ أتمنى ، هو بيقول كده ، كنتُ أتمنى إن إنتو بإختياركم الحر ، كنتو تؤمروا بالمعروف و تنهوا عن المنكر ، إلا قليل فعلاً منكم بس إلتزموا بالنصيحة دي ، (إلا قليلاً ممن أنجينا منهم) و اللي بيأمر بالمعروف و ينهى عن المنكر هو ناجي ، نجت نفسه بدايةً و ثم نجى مجتمعه نهايةً ، (و أتبع الذين ظلموا ما أترفوا فيه) دايماً الظالم كده بيحب الترف و بيحب الطغيان ، (و كانوا مجرمين) مجرمين أي يأتون بالأمر الجلل و يظلمون به .
___
{وَمَا كَانَ رَبُّكَ لِيُهْلِكَ الْقُرَى بِظُلْمٍ وَأَهْلُهَا مُصْلِحُونَ} :
أهو ، صمام الآمان أهو ، ربنا مبِيُهلكش أبداً الأمم و القرى و أهلها مصلحون يعني بيأمروا بالمعروف و ينهوا عن المنكر ، الإصلاح هو إيه؟ الأمر بالمعروف و النهي عن المنكر ، اللي أنا قلتُه دلوقتي إيه؟ في الدولة الحديثة أو في المجتمعات الحديثة اللي تطورت دلوقتي و أصبح فيها نظام حكم متطور ، زي ما قلتُ الإصلاح هو اللي قلتُه ده ، ماشي؟ .
___
{وَلَوْ شَاء رَبُّكَ لَجَعَلَ النَّاسَ أُمَّةً وَاحِدَةً وَلاَ يَزَالُونَ مُخْتَلِفِينَ} :
يعني ربنا شاء إن الأرض تبقى مليئة بالأمم المختلفة و المتنوعة ، و الحضارات المختلفة و المتنوعة ، و لو ربنا جمعهم ، برضو إيه؟ (و لا يزالون مختلفين) لأن كده هي طبيعة الثقافات و الحضارات ، تجتمع مع بعضها و لكن هي فيها تنوع ، تنوع .
___
{إِلاَّ مَن رَّحِمَ رَبُّكَ وَلِذَلِكَ خَلَقَهُمْ وَتَمَّتْ كَلِمَةُ رَبِّكَ لَأَمْلَأَنَّ جَهَنَّمَ مِنَ الْجِنَّةِ وَالنَّاسِ أَجْمَعِينَ} :
(و لو شاء ربك لجعل الناس أمة واحدة و لا يزالون مختلفين إلا من رحم ربك) اللي ربنا أعطاه الرحمة هو اللي هيعرف يتعامل مع الأمم المختلفة بالعدل و الإنصاف لأنها الرحمة ، لأن الرحمة جامعة ، الرحمة صفة جامعة اللي هي الإنسانية يعني دلوقتي ، الرحمة ، هيئات الإغاثة ، هيئات الإعلام الحر ، أطباء بلا حدود ، كل دي من الرحمة اللي ربنا عملها في العصر الحديث ببركة نزول المسيح الموعود ﷺ ، قبل المسيح الموعود مكنش فيه الكلام ده ، مكنش في عدل ، مكنش في حقوق إنسان ، ماكنتش مرسخة بالشكل اللي الموجود فيه دلوقتي ، حقوق الإنسان ، حق تقرير المصير ، هيئات الإغاثة العالمية ، مكافحة المجاعات في كافة أنحاء العالم ، صح كده؟ التكافل العالمي و التكافل الإجتماعي مكنش موجود بالشكل القوي اللي هو موجود في العصر الحديث ده قبل المسيح الموعود ، مكنش موجود قبل المسيح الموعود كده ، المسيح الموعود لما نزل ملأ الأرض عدل كما مُلئت ظلم قبل كده ، صح كده؟ ف دي ببركة نزول المسيح الموعود ﷺ ، ماشي؟ طيب ، (و لذلك خلقهم) خلقهم عشان يبتليهم ، هيشوف مين اللي هيرحم و مين اللي مش هيرحم ، صح كده؟ هيشوف مين اللي هيأمر بالمعروف و ينهى عن المنكر و مين اللي هيعمل عكس ده ، (و تمت كلمة ربك) ربنا قرر ، (لأملأن جهنم من الجِنة و الناس أجمعين) يعني الجن و الإنس العصاة سيدخلون جهنم ، يملؤونها .
___
{وَكُلاًّ نَّقُصُّ عَلَيْكَ مِنْ أَنبَاء الرُّسُلِ مَا نُثَبِّتُ بِهِ فُؤَادَكَ وَجَاءَكَ فِي هَذِهِ الْحَقُّ وَمَوْعِظَةٌ وَذِكْرَى لِلْمُؤْمِنِينَ} :
(و كلا نقص عليك من أنباء الرسل) (و كُلاً) يعني كل حين ، كل وقت ، كل فترة ، (و كلا نقص عليك من أنباء الرسل) أنباء الأمم السابقة ، ليه بقى؟ (ما يثبت به فؤادك) تخليك تثبت و تطمئن في دعوتك ، (و جاءك في هذه الحق) يعني في هذه السورة ، سورة هود يعني ، (و جاءك في هذه الحق و موعظة و ذكرى للمؤمنين) مواعظ مليئة بالحق ، و هي إيه؟ موعظة و ذكرى للمؤمنين ، بالتذكير ، (و ذَكر فإن الذكرى تنفع المؤمنين) .
___
{وَقُل لِّلَّذِينَ لاَ يُؤْمِنُونَ اعْمَلُواْ عَلَى مَكَانَتِكُمْ إِنَّا عَامِلُونَ} :
(و قل للذين لا يؤمنون) اللي هم مش عاوزين يسمعوا كلامك و بيتكبروا عليك و مش عاوزين يستخيروا فيك ربنا ، (اعملوا على مكانتكم) خليكم زي ما إنتو ، (إنَّا عاملون) يعني إيه؟ قل لهم براحتكم ، و ده في تهديد مبطن طبعاً ، عقيدة التربص ، (و قل للذين لا يؤمنون اعملوا على مكانتكم إنا عاملون) إنتو بتعملوا في الكفر و إحنا بنعمل في الإيمان .
___
{وَانتَظِرُوا إِنَّا مُنتَظِرُونَ} :
عقيدة الإنتظار و التربص ، اللي هو الزمان كفيل بإظهار إيه؟ الذي على الحق .
___
{وَلِلَّهِ غَيْبُ السَّمَاوَاتِ وَالأَرْضِ وَإِلَيْهِ يُرْجَعُ الأَمْرُ كُلُّهُ فَاعْبُدْهُ وَتَوَكَّلْ عَلَيْهِ وَمَا رَبُّكَ بِغَافِلٍ عَمَّا تعملون} :
(و لله غيب السماوات و الأرض) صفة عظيمة سبحانه و تعالى لله ، علام الغيوب ، (و إليه يُرجع الأمر كله) كل شيء يرجع لله عز و جل يوم الدينونة ، (فاعبده و توكل عليه) اعبد الله عز و جل و ليكن وكيلك ، ماتخفش ، إثبت ، (و ما ربك بغافل عما تعملون) بيأكد ربنا تاني على صفة الإحسان و المراقبة ، (و ما ربك بغافل عما تعملون) .
● و أثناء تصحيح نبي الله الحبيب يوسف الثاني ﷺ لتلاوتنا لهذا الوجه ، قال لنا :
طبعاً (و زلفاً) أي من باب التقرب ، زلفا أي قربة ، (و زلفاً من الليل) يعني عاوز تتقرب من الله ، صلِ في الليل يعني ، صلِ زيادة في الليل صلاة نفل ، ده المعنى .
عرفنا بقى الوجه ده إن ربنا بيتمنى ، صح؟ صفة جديدة ، حد كان يعرفها؟؟؟؟ محدش كان بيتكلم الكلام ده ، محدش يجرؤ يتكلم عن ربنا كده ، لأنهم ميعرفوش ربنا ، اللي ميعرفش المسيح الموعود ميعرفش ربنا ، اللي يعرف المسيح الموعود و يؤمن به يعرف ربنا ، زَيِنَّا/مثلنا كده ، و اللي يعرف ربنا يقدر يتكلم عنه لأنه عارفه ، أهو ربنا بيتمنى ، بيتمنى الخير و بيتمنى الصلاح ، دليل إيه؟ أنه مُعطيك الإختيار الكامل ، معطيك الإختيار الكامل و اللي بعده يكون التسيير ، في سلسلة من التخييرات و التسييرات ، حد كان يعرف الكلام ده؟؟ محدش كان يعرف الكلام ده ، مين اللي خلانا نعرف الكلام ده؟ الإيمان ، الإيمان بالمسيح الموعود ﷺ ، حتى لو المسيح الموعود لم يقل التفاصيل دي ، ربنا يُعطيها للمؤمنين به ، يُعطيها للمؤمنين ، صح كده؟ .
طبعاً التمني هنا معناه أن الله يرجو الخير ، معنى التمني هنا ، اللي إحنا نقصده أن الله يرجو الخير ، يرجو الخير .
___
و أَنهى الجلسة بأن طلب قمر الأنبياء يوسف الثاني ﷺ من مروان و رفيدة و أرسلان بإستخراج أمثلة على أحكام طلبها منهم من هذا الوجه :
طلب من مروان مثال على مد عارض للسكون ، فقال :
{تعملون} .
و طلب من رفيدة مثال على مد طبيعي ، فقالت :
{وَاحِدَةً} .
و طلب من أرسلان مثال على مد متصل واجب ، فقال :
{مِنْ أَوْلِيَاء} .
___
و اختتم نبي الله الجلسة المباركة بقوله المبارك :
هذا و صلِّ اللَّهم و سلم على نبينا محمد و على آله و صحبه و سلم ، سبحانك اللهم و بحمدك ، أشهد أن لا إله إلا أنت ، أستغفرك و أتوب إليك .
___
و الحمد لله رب العالمين . و صلِّ يا ربي و سلم على أنبياءك الكرام محمد و أحمد و يوسف بن المسيح صلوات تلو صلوات طيبات مباركات ، و على أنبياء عهد محمد الآتين في مستقبل قرون السنين أجمعين . آمين .🌿💙
___
"تمسك بأوتار وصال الحُب و الإيمان في قلبك بينك و بين الله ، لا تفلتها ، لا تُرخي قبضة يدك عنها ، كن لها و كن معها لترتقي بها ، و لا يكون لك ذلك إلا بالنبي و بإتباعه و إطاعته و التقرب منه ، أن تكون تلميذاً له بل إبناً أولاً ، لا تبخل على نفسك بالتقرب منه و التلذذ بفيوضه التي لا تنتهي ، دع الآفاق التي فيك تتسع أكثر و أكثر ، لا تبخل على نفسك بسؤال النبي و طلب الدعاء منه و إستشارته في أصغر أمورك لأكبرها ، لا تبخل على نفسك هذا القرب المقدس المبارك ، إقترب و لا تخف ، و اجعل قلبك يرتوي بإستمرار من دوحة إسماعيل(المدونة المباركة) ، النجاة النجاة هي إتباع النبي ، نبي الزمان ، يوسف بن المسيح ﷺ ." 🍃💙
===========
===========================
آسيا :
جميلة محمد :
.
و كنت قد رأيت في الرؤيا أن بيتي هو حماية للناس من الذئاب . و وجدت أن بشرا كثيرون يدخلون بيتي ليجدوا الأمان . و رأيت الهبة تدخل بيتي . و رأيت أنني أمام منزلي أجلس و أطعم الناس طعاما يقطع ظلمة الليل .
ليست هناك تعليقات:
إرسال تعليق