درس القرآن و تفسير الوجه السابع من يوسف .
::::::::::::::::::::::::::::::::::::::::::::::::::::::::::::::::
أسماء إبراهيم :
شرح لنا سيدي و حبيبي يوسف بن المسيح ﷺ أثناء جلسة التلاوة المباركة من أحكام التلاوة ؛ من أحكام المد , ثم قام بقراءة الوجه السابع من أوجه سورة يوسف ، و أجاب على أسئلتنا بهذا الوجه ، و أنهى نبي الله الحبيب الجلسة بأن صحح لنا تلاوتنا .
بدأ نبي الله جلسة التلاوة المباركة بقوله :
الحمد لله ، الحمد لله وحده ، الحمد لله وحده و الصلاة و السلام على محمد و من تبعه من أنبياء عهده و بعد ، لدينا اليوم الوجه السابع من أوجه سورة يوسف ، و نبدأ بأحكام التلاوة و أحمد :
أحكام المد و نوعيه :
مد أصلي طبيعي و مد فرعي , المد الأصلي يُمد بمقدار حركتين و حروفه (الألف , الواو , الياء) , و المد الفرعي يكون بسبب الهمزة أو السكون .
أما الذي بسبب الهمزة فهو مد متصل واجب و مقداره ٤ إلى ٥ حركات , و مد منفصل جائز مقداره ٤ إلى ه حركات , و مد صلة كبرى مقداره ٤ إلى ٥ حركات جوازاً , و مد صلة صغرى مقداره حركتان وجوباً .
و بعد أحمد قال الأحكام مروان ثم رفيدة ثم أرسلان .
__
○ و ثم طلب سيدي يوسف بن المسيح ﷺ من أحمد قراءة سورة قريش ، و صحح له قراءته .
__
و ثم تابع نبي الله يوسف الثاني ﷺ الجلسة بشرح الوجه لنا فقال :
طبعاً إحنا عرفنا إن ربنا قَدَرَ قدر عظيم جداً ليعلو شأن يوسف النبي -عليه السلام- ، طبعاً يوسف ارتكب مخالفة غير مقصودة يعني ، إن هو رضخ لسبب دنيوي نتيجة الضعف البشري ، لما قال للذي ظن أنه نجى و اللي هو ساقي الملك ، نجاة ظاهرية ، هو ظن النجاة ، ربنا هيتكلم في الوجه ده إنه نجى النجاة الظاهرية اللي بيعرفها كل الناس ، أو اللي بيفهمها كل الناس ، قال له توسطلي عند الملك إنه أنا أخرج ، لأن أنا دخلت السجن مظلوم ، ف دي كانت تعتبر مخالفة بالنسبة لمرتبة يوسف النبي ، فربنا لم يرضى إن اللي يخرجه من السجن واحد خدام ، فتبقى وحشة في حق يوسف يعني ، إيه ده ، صح كده؟ فربنا بقى عَطَّشَ أمة كاملة في القدر المُبرم في السماء عشان يخرج يوسف ، شوفوا بقى سبب الأسباب إزاي ، سبب الأسباب العظيمة ، سَبب سبب عظيم جداً و قوي جداً علشان إيه ، يكون هو ده السبب اللي يخرج بسببه يوسف من الظلم و من السجن ، لأن يوسف هو خبير في التأويل ، ربنا أعطاه العلم ده ، صح كده؟ ، يوسف يخرج بسبب ساقي الملك اللي هو الخدام ، سبب دنيوي ، و للا/أم يخرج بسبب آخر اللي/الذي هو عطش أمة كاملة ، يكون هو ربنا سببه في إيه ، إن الأمة ده إيه؟ متعطشش أو إنها تنجو ، ف دي أسباب دنيوية أهي ، ربنا سببهاله ، صح؟ يعني قَدر في القدر المُبرم إن أمة مصر دي هتعطش ، لازم تعطش خلاص ، هيجيلها سنين عطش ، و الخبر ده أتى لملك مصر ساعتها بالرؤيا ، بالرموز في الرؤيا ، تمام ، فمين اللي هيحل اللغز ده؟ و يفهمهم الحل ، اللي هو كان موجود في الرؤيا أصلاً ، و هم مش واخدين بالهم إن الحل موجود في الرؤيا ، في رؤيا الملك ، و أقول لكم إزاي دلوقتي ، يبقى ربنا سَبَّبَ سبب عظيم أعظم من واسطة الساقي اللي كان طلبها يوسف في الأول ، فربنا كده رفع قدر يوسف ، خلى/جعل السبب اللي يخرج به من السجن ، سبب عظيم جليل ، إنقاذ أمة ، زي ما هو دلوقتي إيه ، إنقاذ الناس و العالم بأنهم يؤمنوا و يوقنوا إنه في إله يوحي ، و إن سلسلة الأنبياء لم تنقطع ، و إن الرسول ﷺ صادق و أن المسيح الموعود ﷺ صادق ، فهي دي وظيفة إيه؟ جماعة اليوسفيين ، هي عبارة عن شمعة مضيئة في وسط الظلام الحالك في عصر الدجال و في عصر ظبية الدجال ، تمام كده ، ف ده إنقاذ للعالم ، إن هم يصدقوا فعلاً بوجود الله عز و جل يقيناً و يجربوا ده بقى ، لما يصدقوا و يبايعوا ، يجربوا و يستخيروا ، يجربوا ، لأن اللي يصدق و يستخير و يبايع و يحسن الظن هيجرب الوصال و هيجرب النور ده ، ف دي نجاة ، نجاة عظيمة ، تمام كده ، لأن العالم اليوم يعني إيه ، وصل لتقنيات عظيمة جداً دنيوية ، و أسباب دنيوية عظيمة جداً و نِعم دنيوية عظيمة جداً ، و هي دي من صفات عصر الدجال اللي الرسول أخبر عنه ، صح كده؟ لكن ينقص الناس إيه؟ آآه ، الغذاء الروحي و اليقين و السلام النفسي ، و ده موجود فين؟ عند الأنبياء و جماعات الانبياء ، جميل أوي .
___
{قَالُواْ أَضْغَاثُ أَحْلامٍ وَمَا نَحْنُ بِتَأْوِيلِ الأَحْلامِ بِعَالِمِينَ} :
بعد كده إيه ، الملك قال لهم أنه رأى في المنام (إني أرى سبع بقرات سمان يأكلهن سبع عجاف و سبع سنبلات خضر و أخرَ يابسات) الملأ بقى ، الحاشية بتاعته قالوا إيه بقى ، معرفوش ، قالوا إيه؟ (قالوا أضغاث أحلام) و كلمة ضغث يعني إيه ، أضغاث أحلام يعني إيه ، مشاهد متفرقة كده ، عبارة عن تفريغ نفسي أو هلاوس شفتها يا أيها الملك ، (و ما نحن بتأويل الأحلام بعالمين) و إحنا كمان معنديناش خبرة في تأويل الرؤى و الأحلام ، قالوا له كده ، بصريح العبارة ، يعني إستريح ، دي عادي ممكن تكون هلوسات أو تفريغ نفسي ، أضغاث ، أضغاث أي أجزاء ، كذلك كلمة ضغث : الضاد تشتت فظ أليم ، الغيش غبش و ضباب ، الثاء هو صوت الدهشة و الإندهاش أو صوت الأفعى ، تمام كده ، فلما تتجمع الثلاثة أصوات دول مع بعض ، فيبقى أمر مؤلم ، صح؟ أو مشاهد مؤلمة ، أو لا تلتفت إليها ، هم الملأ بيقولوا كده يعني ، قالوا أضغاث ، أضغاث أحلام ، تمام كده ، لأن الضغث هو إيه؟ أجزاء متفرقات مجموعة/جُمعت في حزمة واحدة اللي هي كانت الحلم ، ف دي متفرقات ، ممكن يكون ده تفريغ نفسي ، تمام كده ، ماشي .
___
{وَقَالَ الَّذِي نَجَا مِنْهُمَا وَادَّكَرَ بَعْدَ أُمَّةٍ أَنَاْ أُنَبِّئُكُم بِتَأْوِيلِهِ فَأَرْسِلُونِ} :
(و قال الذي نجا منهما) اللي هو الساقي ، نجى نجاة ظاهرية ، لم يؤاخذ في حادثة أو قضية محاولة إغتيال الملك ، (و ادكر بعد أمة أنا أنبئكم بتأويله فأرسلون) أنا عندي الحل ، و أنا عارف التأويل ، لأني عرفت واحد صالح صديق في فترة الحبس ، أَوّل لي رؤيا و أول لصاحبي رؤيا و الرؤى تحققت ، و كان بيكلمنا طبعاً عن التوحيد و عن الإله الحق ، فرجل صالح .
____
{يُوسُفُ أَيُّهَا الصِّدِّيقُ أَفْتِنَا فِي سَبْعِ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ وَسَبْعِ سُنبُلاتٍ خُضْرٍ وَأُخَرَ يَابِسَاتٍ لَّعَلِّي أَرْجِعُ إِلَى النَّاسِ لَعَلَّهُمْ يَعْلَمُونَ} :
(يوسف أيها الصديق) راح له بقى السجن و قال له يا يوسف ، بيتودد له و يقوله أيها الصديق ، (أفتنا) أعطينا فتوة ، و طبعاً عرفنا كلمة فتوى من أصوات الكلمات قبل كده ، فتوى : فت أي أثر بقوة ، وا : صوت الواو دوي دائري منتظم ، إذاً تأثير بقوة أو تأثير قوي يَعمل دوي دائري منتظم ، أفتنا في رؤيا هي (سبع بقرات سمان يأكلهن سبع عجاف و سبع سنبلات خضر و أخرَ يابسات) البقرة في الرؤيا تأول على أنها سنة ، فالرؤيا دي بتقول إيه؟ إن في سبع سنين خير ، هيجي بعديهم سبع سنين يقضوا عليهم ، باينة خالص أهي ، و الحل إيه بقى؟ أهو (سبع سنبلات خضر و أخرَ يابسات) سبع سنبلات خضرة حديثة النبات ، و بعد كده شاف سبع سنبلات يابسات أو أُخرَ يابسات ، أكثر من سبعة ، يبقى الحل إيه في الجفاف اللي هيحصل ده بعد السبع السنين الخصبة ، إن الناس تخلي/تُبقي في السبع السنين الخصبة ، القمح الأخضر اللي فيها يفضل في السنابل بتاعته و يتخزن في السنابل بتاعته ، يفضل يابس في السنابل بتاعته عشان يُحافظ عليه أكبر قدر من السنين و الوقت ، و الناس تستخدمه وقت الحاجة ، الحل باين أهو ، (يوسف أيها الصديق أفتنا في سبع بقرات سمان يأكلهن سبع عجاف و سبع سنبلات خضر و أخرَ يابسات لعلي أرجع إلى الناس لعلهم يعلمون) .
____
{قَالَ تَزْرَعُونَ سَبْعَ سِنِينَ دَأَبًا فَمَا حَصَدتُّمْ فَذَرُوهُ فِي سُنبُلِهِ إِلاَّ قَلِيلاً مِّمَّا تَأْكُلُونَ} :
قال الحل أهو (قال تزرعون سبع سنين دأباً) سبع سنين تزرعوا بجد ، بدأب ، بقوة ، بقوة حثيثة ، (فما حصدتم فذروه في سنبله) الزرع و السنابل اللي بتحصدوها ، بتجنوها يعني ، خلوها في سنابلها ، خلوا القمح في السنابل ، متفركوش حبات القمح بعيد عن السنبل ، (إلا قليلاً مما تأكلون) القليل اللي هتاكلوه بس كده و تحافظوا عليه ، تاكلوا بقدر معين ، هو ده طبعاً هتطحنوه بعد ما تفرغوه من السنبل .
___
{ثُمَّ يَأْتِي مِن بَعْدِ ذَلِكَ سَبْعٌ شِدَادٌ يَأْكُلْنَ مَا قَدَّمْتُمْ لَهُنَّ إِلاَّ قَلِيلاً مِّمَّا تُحْصِنُونَ} :
(ثم يأتي من بعد ذلك سبع شداد) سبع سنين الجفاف هييجوا/ستأتي بعد سبع سنين الخصب ، (يأكلن ما قدمتم لهن) بطريقتين : إن إحنا هناكل من القمح المُخزن ، ف ده يُعتبر (يأكلن ما قدمتم لهن) ، كذلك أي محاولة للزراعة هتبوء بالفشل إلا قليل ، (إلا قليلاً مما تحصنون) إلا بعض الأراضي اللي مش هيصيبها الجفاف ، و دي هتكون قليلة ، هتزرعوا فيها بصعوبة ، (إلا قليلاً مما تحصنون) أي تحمون و تحافظون على تلك الأرض .
___
{ثُمَّ يَأْتِي مِن بَعْدِ ذَلِكَ عَامٌ فِيهِ يُغَاثُ النَّاسُ وَفِيهِ يَعْصِرُونَ} :
عام بعد السبع الشداد ، هيكون فيه الخير بقى و هيزول الجفاف ، و تبدأ الثمار تينع و هنبدأ نعصر الثمار دي ، زي إيه مثلاً؟ نعصر العنب ، و نعصر السمسم ، و نعصر الحاجات اللي بتطلع مواد غذائية طيبة ، ماشي ، و الزيتون نعصره يطلع زيت الزيتون ، كده يعني .
- طبعاً (و ادكر بعد أمة) يعني تذكر بعد فترة طويلة ، أمة : فترة طويلة ، ماشي .
___
{وَقَالَ الْمَلِكُ ائْتُونِي بِهِ فَلَمَّا جَاءَهُ الرَّسُولُ قَالَ ارْجِعْ إِلَى رَبِّكَ فَاسْأَلْهُ مَا بَالُ النِّسْوَةِ الَّلاتِي قَطَّعْنَ أَيْدِيَهُنَّ إِنَّ رَبِّي بِكَيْدِهِنَّ عَلِيمٌ} :
(و قال الملك ائتوني به) لما سمع التأويل عجبه أوي ، و فَهِمَ أن ده رجل حكيم ، و كلام منطقي جداً ، و الحلول اللي قالها ، حلول حكيمة جداً ، ملك مصر ساعتها قال إيه (و قال الملك ائتوني به) يعني قربوه مني ، خلوه/اجعلوه يبقى من الملأ بتاعي أو الحاشية بتاعتي ، (فلما جاءه الرسول) رسول الملك ليوسف يعني ، (قال ارجع إلى ربك) أي الملك ، (فأسأله ما بال النسوة اللاتي قطعن أيديهن) هنا يوسف قال لهم الحل من غير ما يستنى مقابل في الأول ، لم يقل لهم : مش هقول لكم الحل إلا لما تطلعوني من السجن ، ده دليل إيه؟ إنه شخص نبيل ، شخص شريف ، صح كده ، قلبه طاهر ، أهو بشكل واضح أهو ، قال لهم الحل من غير ما يطلب المقابل أو قال لهم الحل مباشرةً و العلاج من غير ما يطلب المقابل ، بعد كده لما الملك قال له اطلع ، قال له : لا ، مش هطلع إلا لما تُظهر براءتي ، (و قال الملك ائتوني به فلما جاءه الرسول قال ارجع إلى ربك فأسأله ما بال النسوة اللاتي قطعن أيديهن إن ربي بكيدهم عليم) في شوية نساء أخلاقهن سيئة ، كانوا يُردن بي السوء و الكيد ، إن ربي مطلع على كيدهن .
___
{قَالَ مَا خَطْبُكُنَّ إِذْ رَاوَدتُّنَّ يُوسُفَ عَن نَّفْسِهِ قُلْنَ حَاشَ لِلَّهِ مَا عَلِمْنَا عَلَيْهِ مِن سُوءٍ قَالَتِ امْرَأَةُ الْعَزِيزِ الآنَ حَصْحَصَ الْحَقُّ أَنَاْ رَاوَدتُّهُ عَن نَّفْسِهِ وَإِنَّهُ لَمِنَ الصَّادِقِينَ} :
(قال ما خطبكن إذ راودتن يوسف عن نفسه) هنا الملك بقى عمل تحريات و جمع النساء اللي هم آذوا يوسف ، منهم اللي تحرش بيوسف لفظي و منهم من حاول يتحرش به بشكل جسدي ، بشكل مادي يعني ، (قلن حاش لله ما علمنا عليه من سوء) هنا شهدوا شهادة حق ، بأنه رجل صالح ، بريء ، طاهر ، (قالت إمرأة العزيز) مرات/زوجة الباشا يعني أو سيدته اللي كانت بتملكه ، (الآن حصحص الحق) الحق دلوقتي ظهر و اتصل بالوجود و حصل و ظهر و شع و بَانَّ ، لا مفر من الحق ، (أنا راوداته عن نفسه) يعني أنا اللي تحرشت به ، (و إنه لمن الصادقين) آآه ، ظهرت الحقيقة ، ظهرت الحقيقة و ظهرت البراءة ، من فوق سبع سماوات ، إزاي بقى؟ بترتيب ربنا سبحانه و تعالى ، ترتيب عظيم جداً ، سبحانه و تعالى ، لذلك ربنا هو غير متوقع ، أقداره غير متوقعة ، (إن ربي لطيف لما يشاء) كده ، سبحان الله .
___
{ذَلِكَ لِيَعْلَمَ أَنِّي لَمْ أَخُنْهُ بِالْغَيْبِ وَأَنَّ اللَّهَ لاَ يَهْدِي كَيْدَ الْخَائِنِينَ} :
بعد كده يوسف بيقول إيه بقى (ذلك ليعلم أني لم أخنه بالغيب) أنا ماخنتش ربنا و ماخنتش سيدي اللي هو زوجها بالغيب ، أبداً ، لأن النبي و الأنبياء و المخلصين من جماعات الأنبياء لا يكون عندهم لا غدر و لا خيانة ، دي من صفات المؤمنين المُخلصين ، (و أن الله لا يهدي كيد الخائنين) مين اللي خان؟ النسوة و إمرأة العزيز ، هم الخونة ، (و أن الله لا يهدي كيد الخائنين) ربنا مابيكملش كيد الخائنين ، بيبطل كيد الخيانة ، و خصوصاً إذا كانت ضد الصالحين و الأنبياء .
___
{وَمَا أُبَرِّئُ نَفْسِي إِنَّ النَّفْسَ لأَمَّارَةٌ بِالسُّوءِ إِلاَّ مَا رَحِمَ رَبِّيَ إِنَّ رَبِّي غَفُورٌ رَّحِيمٌ} :
و يوسف بيقول إيه بقى ، بيقول إنه هو كان إيه ، شخص و إنسان زي كل البشر ، بيقول (و ما أبرئ نفسي إن النفس لأمارة بالسوء) أكيد جواه/داخله نوازع و رغبات إنسانية عادية جداً ، و جواه غرائز و لكنه إيه ، يتحكم بها و يصبر ، (و ما أبرئ نفسي إن النفس لأمارة بالسوء إلا ما رحم ربي) إلا الأوقات اللي ربنا بيرحمنا فيها ، فإيه نستغفر ، (إن ربي غفور رحيم) ربنا طبيعته إيه ، الغفران و الرحمة ، فهنا بِيحَبب الناس في الإله الحق ، و بيحبب أهل مصر في إله بني إسرائيل اللي هو الإله الحق ، الله ربنا و رب آباءنا الأولين .
__
● و أثناء تصحيح نبي الله الحبيب يوسف الثاني ﷺ لتلاوتنا ، قال لنا :
- طبعاً كلمة خطب أو خطبكن هو الأمر الجلل أو الأمر العظيم .
- حصحص اللي هو الحقيقة ظهرت أو بانت ، فتم تبسيط العقدة اللي كانت موجودة ، بنفي الكذب و إظهار الصدق ، لأن لما مايكونش في خداع و مايكونش في كذب و تدليس و نفاق ، الدنيا هتبقى بسيطة ، مش هتبقى متعقدة ، مايبقاش فيها عُقَد ، الدنيا لما تبقى بسيطة كده ، تبقى سهلة ، تبقى النفوس مرتاحة ، فيحصل لها إيه؟ إتصال بالراحة ، حصحص : حاء راحة و صاد إتصال مكرر مضاعف ، حصحص ، الحق لما ظهر و الكذب إنتفى ، أصبح هناك حل للعقدة ، مش دي كانت عقدة ، القصة دي فيها عقدة أهي ، فيها عدة عُقَد ، يجب أن تُحل و سببها إيه ، حرب بين قوى الظلام و قوى النور ، الحروب دي بتعمل العُقَد دي ، و الحروب أصلها إيه؟ الكذب و الخداع و الرياء و الطمع و النفاق و الكذب ، فلما الصدق يظهر ، و الخداع ينتفي و الكذب ينتفي ، يحصل إيه؟ يحصحص الحق ، الحق يُحصحص ، حصحص : ظهر و بان و إتصل و أوصلنا إلى الراحة بشكل مكرر ، فهو ده إيه؟ فايدة الصدق ، فلذلك سُمي يوسف أيها الصديق ، الصدق ، ميعرفش يكذب ، ميعرفش يقول خلاف الحق ، كده هي طبيعته كده .
- طبعاً (لعلهم يعلمون) يعلمون يعني يفهموا العلم اللي أتى أو يفهموا الرؤيا و الوحي ده ، فيبقوا هم لما فهموه كده أصبحوا متصلين بعالم السماء ، فأصبحوا يعلمون ، أخذوا من صفة العلم اللي هي الوحي الإلهي ، يعني فهموا الوحي ، اللي يفهم الوحي الإلهي يبقى كده أصبح عالم ، هو ده العلم الحقيقي و العرفان الحقيقي .
- يبقى هنا مين اللي أكل؟ السبع العجاف اللي هم الوحشين الهزال القبيحين أكلوا السبع بقرات السمان الحلوين ، لكن مفيش أي مشهد خالص في الرؤيا بيقول إن السبع السنبلات اليابسة أكلت الخضرا ، المشهد مابيقولش كده ، المشهد بتاع السنبلات ده بيقول الحل ، اللي يأول لك و يقولك كان في سبع سنبلات يابسة كده إلتفت حول السبع السنبلات الخضر و أكلتها و قتلتها ، ده تأويل خاطئ ، صح؟ طبعاً إنتو فاهمين أنا أقصد إيه ، ف ده هو التأويل الصحيح (و سبع سنبلات خضر و أخرَ يابسات) بس المشهد كده ، سبع سنبلات خضرا كده و شاف سبع سنبلات يابسات أو سنبلات آخرين أو أُخر يابسات ، الحل إيه؟ الخضرا دول يبقو كده ، تحافظوا عليهم كده ، بس ، يعني الخضرا تحافظوا عليها في السنبلة ، تخزنوها في السنبلة ، هو ده الحل ، ماشي؟ . يعني السنابل اليابسة هي رمز الخير و النجاة و هو رمز محمود .
- الحاجات اللي كانت بتتعصر من المحاصيل الزراعية : السمسم عشان تطلع/تُخرج الزيت ، زيت السمسم أو دهن السمسم ، الزيتون اللي كان ييتزرع في سيناء عشان يطلع زيت الزيتون ، و إيه تاني ، العنب عشان العصير و ساعات زمان كانوا بيعملوا منه إيه ؟ الخمر ، و أي حاجة تنفع تتعصر هيعصروها طبعاً و يتنعموا بها .
- شفتوا ، خلوا بالكوا من كلمة (رَاوَدتُّنَّ) دي ، فيها هنا إدغام جناس ، الدال مع التاء ، دال تاء ، لاحظ كده ، إنطق كده الدال و إنطق التاء ، دال ، تاء ، تلاقي طرف اللسان خبط فين؟ في أعلى الأسنان الأمامية ، دال تاء ، فنفس المخرج أهو ، نفس مخرج الصوت ، فلما يجيوا ورا بعض يحدث جناس ، إدغام تجانس أو جناس ، (قال ما خطبكن إذ رَاوَدتُّنَّ) مابيقلش (إذ راودَتن) ، لا (إذ رَاوَتُّنَّ) ، فهمتوا يعني إيه إدغام جناس؟؟ ده نوع من أنواع الإدغام ، يمكن إحنا مش كاتبيته في ورقة الأحكام ، بس دايماً أنا بشير له من وقت لآخر ، و عرفنا كلمة (حاش لله) قبل كده .
- طبعاً أحلام ، أضغاث أحلام ، الأحلام جمع حُلم ، و الحُلم هو العقل ، و الأحلام هي العقول ، كذلك ممكن يكون معناها مشاهد الرؤيا ، أضغاث أحلام يعني أفكار متفرقات ، إنت كنت بتفكر في الحاجات دي ، فتجمعت في مشاهد كده شفتها و ملهاش أي معنى ، ده معنى كلام الملأ للملك .
___
و اختتم نبي الله الجلسة المباركة بقوله المبارك :
هذا و صلِّ اللَّهم و سلم على نبينا محمد و على آله و صحبه و سلم تسليماً ، سبحانك اللهم و بحمدك ، أشهد أن لا إله إلا أنت ، أستغفرك و أتوب إليك .
___
و الحمد لله رب العالمين . و صلِّ يا ربي و سلم على أنبياءك الكرام محمد و أحمد و يوسف بن المسيح صلوات تلو صلوات طيبات مباركات ، و على أنبياء عهد محمد الآتين في مستقبل قرون السنين أجمعين . آمين .🌿💙
=========================
حازم :
ليست هناك تعليقات:
إرسال تعليق